Il Chor d’affons Sumvitg ei in chor cun 42 affons denter 9 e 16 onns che han plascher da cantar. Auter che quei ch’il num lai supponer vegnan ils affons dallas vischnauncas da Sumvitg, Trun, Mustér, Tujetsch e schizun dalla Lumnezia. Il chor ei vegnius fundaus 1998 e quei per promover il plascher da cantar tiels affons. Dapi 2006 diregia Flavia Walder il chor e quei cun bien maun e sentiment.

Ils puncts culminonts dil chor dils davos onns ein segiramein stai la presentaziun dil musical “Pamplona” en atgna reschia egl onn 2008, dil teater musical “BLING BLING” sut la reschia da Jürg Gautschi egl onn 2013, ils concerts annunals la primavera ni d’Advent sco era las fetg bialas presentaziuns a caschun dallas fiastas da cant. Seigi quei stau a caschun dalla fiasta da cant districtuala a Glion (2011) ed a Salouf (2014) ni era alla fiasta cantunala a Trun (2012). Plinavon ei la canunzun “il siemi” da Gion Balzer Casanova ch’il chor ha registrau cun igl ensemble Decanto vegnida giavischada il pli bia digl auditori da radio romontsch igl onn 2011 e 2012. Medemamein in’aventura tut speziala pil chor ein las representaziuns dil lungatg romontsch ell’entira Svizra seigi quei sur las undas da radio romontsch sco era l’emissiun da Nadal 2011 ch’ei vegnida emessa sin SF1.